Искать:

Toshkentda 10-mart – Xalqaro ayol sudyalar kuniga bag‘ishlangan tantanali uchrashuv bo‘lib o‘tdi.

Mamlakatimiz tarixida ilk bor O‘zbekiston ayol sudyalari assotsiatsiyasi tashkil etildi va men ushbu voqea munosabati bilan barchamizni samimiy qutlayman.

Prezidentimiz tomonidan xotin-qizlar va bolalarni zo‘ravonlik hamda tazyiqlardan himoya qilishga qaratilgan muhim farmon qabul qilindi. Bu – inson taqdirini barbod qilib, jinoyatini “an’ana” niqobi ostiga yashirishga, mavqei yoki mansabi bilan xaspo‘shlashga urinayotgan kimsalarga qarshi murosasiz qadamdir. Bu borada sudyalar hal qiluvchi o‘ringa ega: qonun shunday ishlashi kerakki, jinoyatchi uchun bahona ham, “tuynuk” ham qolmasin.

Bunga erishish uchun sudyalar, huquqni muhofaza qiluvchi va tergovga qadar tekshiruv organlari faoliyatining samaradorligi, mas’uliyati yanada oshiriladi hamda zo‘ravonlikning har qanday holatiga real huquqiy baho berilishi ta’minlanadi.

Birinchi bor aynan ushbu xalqaro sana munosabati bilan ayol sudyalarimiz davlat mukofotlari bilan taqdirlandilar. Men buni qat’iyati va halolligi bilan odil sudlovni amalga oshirayotgan insonlarga bo‘lgan yuksak hurmat ifodasi, deb bilaman.

Zo‘ravonlik atrofdagilar sukuti va mazlumlarning qo‘rquvi ortiga aslo yashirina olmasligi kerak. Biz ana shunday muhitni barpo etishni maqsad qilganmiz.

Tumanlarda aholining sudga doir murojaatlari o’rganilmoqda

Aholi murojaatlari bilan ishlashda yangicha tizim yaratilib, joylarda sayyor qabullar tashkil etilayotgani fuqarolarni o‘ylantirayotgan ko‘plab masalalarning ijobiy yechim topishiga sabab bo‘lmoqda.

Xorazm viloyat sudi hamda viloyat ma’muriy sudi rahbariyati tomonidan fuqarolarning sudga doir murojaatlarini “mahallabay” o‘rganish maqsadida o‘tkazilayotgan sayyor qabullarning navbatdagisi Xonqa tumanidagi «Ezgulik» mahallasi hamda Xiva tumanida o‘tkazildi.

Sud-huquq tizimiga doir murojaatlari mavjud bo‘lgan fuqarolar viloyat sudlari raislari va sudyalar tomonidan qabul qilinib, ularga tegishli huquqiy tushuntirishlar berildi.

Xonqa tumanidagi qabul jarayonida murojaatlarning asosiy qismi oilaviy nizolarni sud tartibida hal etish masalasida bo‘ldi. Xususan, nikohdan ajrashmoqchi bo‘lgan yosh oilalarga tuman hokmilgi mas’ul xodimi bilan birgalikda oilani saqlab qolish va yoshlarni ish bilan ta’minlash yuzasidan amaliy yordam berildi.

Xiva tumanidagi qabullarda esa 3 ta ariza ijobiy hal etilib, mahkumlar jazoning o‘talmagan qismidan muddatidan ilgari shartli ravishda ozod qilindi.

Shuningdek, sudda ko‘rilish lozim bo‘lgan ishlar bo‘yicha fuqarolarga sudga da’vo ariza kiritish tartibi tushuntirildi.

Jarayonlarda hech kimning masalasi e’tibordan chetda qolmadi. Qabullardan maqsad ham tumanlarda istiqomat qiluvchi aholini ovora qilmasdan, yashash hududlariga borib muloqotlar o‘tkazish va murojaatlarini hal etish bo‘yicha aniq yo‘nalish berishdir.

Bo’lajak yuristlar bilan ochiq muloqot

 Sud tizimida malakali kadrlar zaxirasini yaratish bugungi kunning ustuvor vazifasidir. Xususan, sudyalik lavozimi uchun belgilangan 35 yoshlik mezonni inobatga olsak, kadrlarni talabalik davridanoq tizimga moslashtirish muhim ahamiyat kasb etadi. Shu sababli, Xorazm viloyat sudlari Urganch davlat universiteti bilan hamkorlikni yo‘lga qo‘yib, yurisprudensiya yo‘nalishida tahsil olayotgan talabalarni yosh kadrlar sifatida tayyorlab bormoqda.

 

Ma’lumki, sud xodimi uchun bilim va ko‘nikmadan tashqari, yuksak muomala madaniyati, halollik va korrupsiyaga nisbatan murosasiz munosabat eng asosiy fazilatlar hisoblanadi. Bu ko‘nikma va talablar esa 2024 yilda tashkil etilib, talabalarni kasbga tayyorlashning samarali mexanizmiga aylanayotgan «Bo‘lajak sud xodimlari» klubida o‘rgatilmoqda.

Universitetda tashkil etilgan navbatdagi uchrashuvda viloyat sudining kadrlar bo‘limi bosh konsultanti S.Salaev va malaka hay’ati kotibi R.Umarov hamda viloyat ma’muriy sudining devonxona mudiri B.Soloev va sudya katta yordamchisi O.Madraximovlar tomonidan talabalarga “Bo‘lajak sud xodimlari” klubining bugungi faoliyati va unga a’zo bo‘lish tartibi, sud tizimiga ishga kirishda xodimlarga qo‘yiladigan talablar to‘liq tushuntirildi.

Shuningdek, muloqotlarda  jamiyatda dolzarb hisoblangan yoshlar o‘rtasidagi jinoyatchilikning oldini olish masalalariga ham to‘xtalindi. Talabalar giyohvandlik, diniy ekstrimizm va korrupsiyaga oid jinoyatlar domiga tushib qolmasliglari tushuntirildi.

TILGA E’TIBOR – ELGA E’TIBOR

Til bu-millatlarni bir-biridan ajratib turuvchi asosiy belgilaridan biridir. Har bir inson o‘z ona tilini bilishi, uni ulug‘lashi va shu bilan birga boshqa millatlarning ona tiliga ham hurmat bilan qarashi lozim. Shundagina tilning, millatning qadri va obro‘yi, nufuzi oshadi. 1989 yilning 21 oktabr kuni Vatanimizda davlat tilining huquqiy asoslarini belgilash bo‘yicha “Davlat tili to‘g‘risida”gi Qonun qabul qilinib, unga ko‘ra O‘zbek tiliga — Davlat tili maqomi berildi. Shuningdek, 2020 yilning 10 aprel kuni O‘zbekiston Respublikasi Prezidenti tomonidan “O‘zbek tili bayrami kunini belgilash to‘g‘risida”gi qonun imzolandi. Qonunga asosan, 21 oktabr “O‘zbek tili bayrami kuni” etib belgilangan. Ushbu sana munosabati bilan viloyat ma’muriy sudida sudya va xodimlar hamda Urganch davlat universitetining dotsenti Sarvarbek Ro‘zimboev ishtirokida ma’naviy-ma’rifiy tadbir o‘tkazildi. Tadbirda o‘zbek tilining kelib chiqishi, rivojlanish tarixi, davlat tili maqomi berilishidagi murakkabliklar va bugungi kunda til siyosatini takomillashtirish borasida olib borilayotgan islohotlar haqida fikr bildirildi. Ma’lumki, har qanday xalqning tarixi, o‘ziga xos tabiati, qadriyatlari, avvalo, o‘sha xalqning ona tilida aks etadi. Bejiz tilni millatning ma’naviy immuniteti deb baholamaganlar. Boisi, o‘z tilini asrab-avaylagan, uni zamonlar osha rivojlantira olgan millatgina o‘zligini, milliy qiyofasini saqlab qoladi.

Yangibozorda fuqarolarning murojaatlari o‘rganildi

Xorazm viloyatida fuqarolarning murojaatlariga samarali yechim topish maqsadida sud va huquqni muhofaza qiluvchi organlar tomonidan tasdiqlangan rejaga asosan Yangibozor tumanida navbatdagi ommaviy sayyor qabul o‘tkazildi. Unda viloyat sudi raisi  Sh.Kamolov va viloyat ma’muriy sudi raisi J. Sultanovalar ishtirok etishib, aholining sudga doir murojaatlarini eshitishdi. Shu yerning o‘zida murojaatchilarga masalalarining yechimi bo‘yicha tegishli huquqiy tushuntirishlar berildi. Fuqarolarning murojaati asosan, apellyatsiya shikoyatini berish, oilaviy va mulkiy nizolar kabi masalalarda bo‘ldi. Shundan kelib chiqib, ularga sudga da’vo arizasi bilan murojaat qilish hamda birinchi instansiya sudi qarorlari ustidan shikoyat berishning yangi tartibi tushuntirildi. Sayyor qabullar aholining huquqiy savodxonligini oshirishga xizmat qilmoqda. Asosiysi, har bir fuqaro o‘z murojaati qaysi organga tegishli ekanligi va uni qanday tartibda hal qilish kerakligini bilib olishdi.

Sudyalar chekka mahallalarda ham aholi bilan muloqot o‘tkazishmoqda

“Mening mahallam – mening sudyam” tamoyili asosida viloyat ma’muriy sudining sudyasi D.Yusupov va Urganch tumanlararo ma’muriy sudi sudyasi I. Shomurotovlar Yangiariq tumanining “Yangier” mahallasida istiqomat qiluvchi fuqarolar bilan ochiq muloqot o‘tkazishdi. Mahalla faollari, xotin-qizlar va yoshlar ishtirokida o‘tgan muloqotlarda asosiy mavzu jismoniy va yuridik shaxslarning ma’muriy sudlarga murojaat qilish tartibi hamda “Manfaatlar to‘qnashuv to‘g‘risida”gi Qonunning mazmun-mohiyatini fuqarolarga yetkazish bo‘ldi. Sud-huquq tizimidagi islohotlar, qonunchilikdagi yangiliklari ham ma’ruzachilar e’tiboridan chetda qolmadi. Muloqotlarda fuqaro va kadastr organlari o‘rtasidagi nizolarning sudda ko‘rish tahlili va bu toifadagi nizolarning oldini olish masalalari haqida ham so‘z yuritilib, ishtirokchilarning mazkur yo‘nalishdagi fikr-mulohazalari eshitildi. Uchrashuv davomida ishtirokchilarning sohaga doir savollariga javob berildi.

Oliy sud raisi o‘rinbosari Ikrom Muslimov boshchiligida Xorazm viloyatida sud-huquq masalalari bo‘yicha ommaviy sayyor qabul o‘tkazildi.

Tadbir davomida 46 nafar fuqaroning murojaatlari qabul qilinib, ularning 16 tasi jinoyat, 18 tasi fuqarolik, 6 tasi iqtisodiy hamda 6 tasi ma’muriy sudlovga oid murojaatlarni tashkil etdi. Shundan 28 ta og‘zaki murojaat va 18 ta yozma ariza qabul qilindi. 28 ta murojaatga huquqiy tushuntirish berildi hamda 18 ta shikoyat va ariza qonuniy ko‘rib chiqish uchun qabul qilindi. Shu kuni taqdimnoma va iltimosnomalar asosida jazo o‘tayotgan 6 nafar shaxs jinoyat ishlari bo‘yicha sudlar tomonidan jazoni o‘tashdan muddatidan ilgari shartli ravishda ozod qilindi. Shuningdek, jinoyat ishlari bo‘yicha Yangibozor tuman sudi tomonidan 1 nafar fuqaroning murojaati asosida Jinoyat kodeksining 122-moddasi bilan bog‘liq ishi ko‘rilib, aliment pullari to‘liq undirib berildi va taraflar yarashtirildi. Fuqarolik ishlari bo‘yicha sudlar tomonidan yuridik faktni tasdiqlash haqidagi 4 ta fuqarolik ishi ko‘rib chiqilib, ijobiy hal qilindi. Ajrashish yoqasiga kelib qolgan besh nafar voyaga yetmagan farzandi bo‘lgan ikki oila yarashtirildi. Sayyor qabulda murojaatlari yechim topgan 7 nafar fuqaro Xorazm viloyat sudlari faoliyati yuzasidan Oliy sud raisi nomiga yozma tashakkurnoma bildirdi.

Mustaqillik bayrami arafasida sudya va sud xodimlari taqdirlandi

O‘zbekiston Respublikasi Oliy sudi tomonidan Davlatimiz mustaqilligining 33 yilligiga bag‘ishlangan bayram tadbiri o‘tkazildi. Videokonferensaloqa tizimi orqali Qoraqalpog‘iston Respublikasi, viloyatlar va Toshkent shahar sudlari ishtirok etgan tadbirda Oliy sud raisi B.Islamov barchani eng ulug‘, eng aziz bayram bilan muborakbod etib, sud tizimida “Benuqson xizmati uchun” ko‘krak nishoni ta’sis etilganini e’tirof etdi. Shundan so‘ng Respublika bo‘yicha bir guruh sud faxriylari, sudya va xodimlar mazkur ko‘krak nishoni bilan taqdirlandilar. Quvonarlisi, bunday yuksak mukofotga Xorazmdan sud faxriysi Qadam Karimov, viloyat ma’muriy sudi raisi Jamila Sultanovalar loyiq deb topildilar. Mukofotlanganlarga ko‘krak nishonlari viloyat sudi raisi tomonidan topshirildi. Shuningdek, tadbirda viloyat ma’muriy sudining devonxona mudiri Bobur Solaev Oliy sud raisining faxriy yorlig‘i bilan taqdirlandi. Jinoyat ishlari bo‘yicha Urganch shahar sudi raisi Murod Hasanovning va fuqarolik ishlari bo‘yicha Mirzo Ulug‘bek tumanlararo sudining raisi Dilshod Hasanovning ota-onalariga Sudyalar oliy kengashining tashakkurnomasi e’lon qilindi. Tadbirning ikkinchi qismida viloyat sudi raisi Sh.Kamolov so‘zga chiqib, barcha sudya va xodimlarni mustaqillik bayrami bilan muborakbod etdi. Shundan so‘ng, viloyat sudi raisining O‘zbekiston Respublikasi Davlat mustaqilligining 33 yilligi munosabati bilan bir guruh sudyalar va sud tizimi xodimlarini rag‘batlantirish to‘g‘risidagi buyrug‘i o‘qib eshittirildi. Unga ko‘ra odil sudlov faoliyatini amalga oshirishga qo‘shayotgan munosib hissasi, fuqarolarning sud idoralariga bo‘lgan ishonchini mustahkamlash yo‘lidagi samarali faoliyati uchun sudya va xodimlar viloyat sudi raisining faxriy yorlig‘i bilan taqdirlandi.

Umumxalq xayriya hasharida ma’muriy sud jamoasi ham faol ishtirok etdi

Xorazm viloyat ma’muriy sudi hamda Urganch tumanlararo ma’muriy sudida ham “Mahalla obod – yurt obod” shiori ostida umumxalq xayriya hashari o‘tkazildi. Unda sudya va sud xodimlari birgalikda ozodalik va hududni tozalash tadbirlarida ishtirok etib, yurtimiz obodligiga o‘z hissalarini qo‘shishdi. Sud binosini va tevarak-atrofni tozalash, daraxtlarga shakl berish va obodonlashtirish kabi vazifalar bajarildi. Hashar-xalqimizning eng xayrli va ezgu amallaridan biri sanaladi. Sud jamoasining har bir a’zosi ushbu hasharda faol ishtirok etib, sitqidildan mehnat qilishdi.

TERGOVChILAR UChUN SEMINAR O‘TKAZILDI

Xorazm viloyat sudi, viloyat IIB hamda viloyat prokuraturasi hamkorligida tergovchilar bilan “Dastlabki tergov organlari tomonidan yo‘l qo‘yilayotgan kamchiliklarning oldini olish” mavzusida seminar o‘tkazildi. Unda viloyat sudi raisining jinoyat ishlari bo‘yicha o‘rinbosari U.Bakdurdiev va viloyat sudi sudyalari M.Mahmudov, M.Samandarov hamda viloyat IIB boshlig‘ining o‘rinbosari E.Soliev, viloyat prokuraturasi bo‘lim prokurori Sh.Shomurodovlar ma’ruza qilib, joriy yilning o‘tgan 6 oyida dastlabki tergov organlari tomonidan taqdim etilgan hujjatlarda aniqlangan kamchiliklar tahliliga to‘xtalishdi.

Muloqotlarda mavjud kamchiliklarni bartaraf etish, yangi qonunlarni qo‘llashda yuzaga kelishi mumkin bo‘lgan tushunmovchiliklarning oldini olish va tergov jarayonida fuqarolarning huquqlarini to‘liq ta’minlash masalalari muhokama qilinib, qatnashchilarning mavzu yuzasidan takliflari eshitildi. Shuningdek, sudyalar tomonidan O‘zbekiston Respublikasi Prezidentining 2024 yil 10 iyundagi “Tezkor-qidiruv hamda tergov faoliyatida shaxsning huquq va erkinliklarini ishonchli himoya qilish kafolatlarini yanada kuchaytirish chora-tadbirlari to‘g‘risida”gi Farmoni mazmun-mohiyati haqida ham tushuntirish berildi.

Перейти к содержимому